Thursday, 18 July 2013

இன்றைய நவீன வாழ்வியல் தேவைகளில் தகவல் தொடர்பு மின்னணு சாதனங்கள் மனித வாழ்வில் முக்கியப் பங்காற்றி வருகின்றன. இவை இல்லாத மனித வாழ்வை யாரும் நினைத்துக்கூடப் பார்க்க முடியாத அளவுக்கு அவை நம் வாழ்வோடு இரண்டறக் கலந்து விட்டன. காடுகளிலும், மலைகளிலும் விலங்குகளோடு விலங்குகளாக அலைந்து திரிந்து கொண்டிருந்த மனிதன் சைகைகளின் மூலமும், ஓசைகளின் மூலமும் கருத்துகளைப் பரிமாறிக் கொண்டான். இதுவே தகவல் தொழில்நுட்பத்தின் முதல் படி. அன்று தொடங்கிய இதன் வளர்ச்சி, இன்று பல்வேறு துறைகளிலும் தன் விழுதுகளைப் பாய்ச்சி, உலகின் எந்த மூலையில் எது நடந்தாலும், அதை அடுத்த நொடியே நம் கண்முன்னே கொண்டு வந்து நிறுத்தி, உலகத்தையே நம் உள்ளங்கைக்குள் சுருக்கிவிட்டது. அதிலும் இன்று செல்போனும், கணினியும் இல்லாத வீடே இல்லை. இவையிரண்டும் இல்லாவிட்டால் மனித குலத்தின் செயல்பாடுகளே முடங்கிவிடும் என்பதே இன்றைய வாழ்க்கை முறை. கோடிக்கணக்கான ரூபாய்களை வரவு - செலவு செய்யும் வங்கிகள் துவங்கி, ஆயிரக்கணக்கான பயணிகளை ஓரிடத்திலிருந்து மற்றோர் இடத்துக்கு அழைத்துச்செல்லும் ரயில் போக்குவரத்து, வியாபாரம், கல்வி, மருத்துவம் என கணினி கால் பதிக்காத துறையே இல்லை என்றுதான் சொல்லவேண்டும். கல்வித்துறையில் கணினி பயிலும் மாணவர்கள் மட்டுமே கையாளும் கணினிகளை, இன்று அனைத்துப் பிரிவு பள்ளி, கல்லூரி மாணவர்களும் பயன்படுத்தும் வகையில் தமிழகத்தில் அரசே அதனை மாணவர்களுக்கு இலவசமாக வழங்கி வருகிறது. இன்று நாட்டில் நடைபெறும் பெரும்பாலான கொலை, கொள்ளைச் சம்பவங்களில் போலீஸார் துப்புதுலக்கி குற்றவாளிகளைக் கைது செய்வதற்கு செல்போன் மற்றும் கண்காணிப்பு கேமராக்கள் பெரிதும் பயன்படுகின்றன. சுனாமி, புயல், வெள்ளம், கனமழை என அனைத்து வகையான இயற்கைச் சீற்றங்களையும் முன்கூட்டியே அறிந்து, முன்னெச்சரிக்கை நடவடிக்கை எடுத்து நம்மைத் தற்காத்துக் கொள்ளக்கூடிய அளவுக்கு விஞ்ஞானம் வளர்ந்திருக்கிறது. மருத்துவத் துறையிலும் முன்புபோல உடலைக் கிழித்து செய்யும் அறுவை சிகிச்சைகளுக்குப் பதிலாக உடலில் ஒரே ஒரு துளை போட்டு அத் துளையின் வழியே உடல் உள்ளுறுப்புகளைப் பார்த்து செய்யும் அறுவைச் சிகிச்சைகள் நடைமுறைக்கு வந்துவிட்டன. மூளையையும், உடல் உள் உறுப்புகளையும் பல கோணங்களில் படம்பிடித்துக் காட்டக் கூடிய நவீன அறிவியல், மனிதன் முழுமையாகக் கணினிமயமாகி விட்டதைத்தான் காட்டுகிறது. இவ்வாறு மனித வாழ்வோடு இரண்டறக் கலந்துவிட்ட கணினி யுகம் பல்வேறு குறைகளையும், தீமைகளையும் தன்னகத்தே கொண்டுள்ளது. எந்தவொரு கண்டுபிடிப்பையும் நன்மைக்காகப் பயன்படுத்துவதும், தீமைக்காகப் பயன்படுத்துவதும் நம் கையில்தானே இருக்கிறது? அதில் மிக முக்கியமான பிரச்னை, பெருகிவரும் "சைபர் கிரைம்' என்றழைக்கப்படும் தகவல் தொழில்நுட்பக் குற்றங்கள் தொடர்பானதாகும். வாடிக்கையாளர்களுக்குத் தெரியாமலேயே அவர்களின் வங்கிக் கணக்கிலிருக்கும் பணத்தை இணையதளம் வழியாகத் திருடுவது, மற்ற நிறுவனங்கள் மற்றும் அரசின் தகவல்களைத் திருடுவது, ரயில்கள் மற்றும் கோயில் போன்ற இடங்களுக்கு வெடிகுண்டு அச்சுறுத்தல் ஏற்படுத்துவது, பெண்களுக்கு ஆபாசமான குறுஞ்செய்திகளை அனுப்புவது என பெருகிவரும் "சைபர்' குற்றங்களை அடுக்கிக்கொண்டே செல்லலாம். கணிசமான இளைஞர்கள் இணையத் தேடல்களில் சினிமா, கிரிக்கெட் செய்திகளுக்கு முக்கியத்துவம் தருகின்றனர். நண்பர்களுடன் வெட்டியாக அரட்டை அடிக்கவும் பயன்படுத்துகின்றனர். ஆக்கப்பூர்வமான அறிவுத் தேடல்கள் மேற்கொள்வோர் மிகமிகக் குறைவு. பெருகிவரும் மக்கள்தொகை, வேலையில்லாத் திண்டாட்டத்தில் நமக்கு கிடைத்திருக்கும் வாய்ப்புகளைப் பயன்படுத்தி, வாழ்வை முன்னேற்றிக் கொள்ள இளம் தலைமுறையினர் சிந்திக்க வேண்டுமே தவிர, தங்களின் ஆற்றலை இப்படி வீணான விஷயங்களில் விரயமாக்கக் கூடாது. அமெரிக்கா போன்ற பல்வேறு நாடுகளில் உள்ள இந்தியக் கணினியியல் வல்லுநர்களை நாம் மீண்டும் நம் நாட்டுக்கு அழைத்துக் கொண்டால், அந்த நாடுகளின் இயக்கமே கணிசமாக நின்றுபோகுமளவுக்கு இந்தியர்களின் மூளைகளே அந்த நாடுகளின் முன்னேற்றத்துக்குக் காரணமாக இருக்கின்றன. சுமார் 35 சதவீதத்துக்கும் மேலான இந்தியர்கள் வெளிநாடுகளில் கணினித் துறையில் பணியாற்றி வருகின்றனர் என்றால், நமது திறமையின் அளவை நாமே எடை போட்டுக் கொள்ளலாம். பாலை உறிஞ்சி, நீரை ஒதுக்கும் அன்னப் பறவைபோல நன்மையைப் பயன்படுத்தி, தீயவற்றை நீக்கும் மனப்பக்குவம் நம் அனைவருக்கும் வந்தால்தான், முன்னேற்றம் என்பது சாத்தியப்படும்.

ராமநாதபுரம் மாவட்டம், முதுகுளத்தூர் மற்றும் கடலாடியில் அரசு கல்லூரி புதிய கட்டடங்கள் கட்ட 
தேர்வு செய்யப்பட்டுள்ள இடங்களை, உயர் கல்வித்துறை அமைச்சர் பி.பழனியப்பன் இன்று(புதன் கிழமை) பகல், நேரில் பார்வையிட்டு ஆய்வு செய் தார்.
2013-2014-ம் கல்வியாண்டில் தமிழகத்தில் அரசு புதிய க்லலூரிகள் துவங்க முதல்வர் ஜெயலலிதா உத்தரவிடடுள்ளார். இதில் ராமநாதபுரம் மாவட்டம் முதுகுளத்தூரிலும், கடலாடியிலும் அரசு புதிய கல்லூரிகள் துவங்கப்டுகின்றன. இவ்விரு கல்லூரிகளும் ஜூலை.27 முதல் துவங்கப்பட உள்ளன.  புதிய இரு கல்லூரிகளில் மாணவ, மாணவிகள் சேர்க்கை குறித்து விண்ணப்பங்கள் நாளை மறு நாள்(ஜூலை.19) வரையிலும் வழங்கப்டுகின்றன. கடலாடியிலும், முதுகுளத்தூரிலும் தற்காலிகமாக அரசு மேனிலைப்பள்ளி வளாகத்தில் கல்லூரி வகுப்புகள் நடைபெற உள்ளன.
இதற்கிடையில் புதிய கல்லூரிகளுக்குரிய கட்டடங்கள் கட்டப்பட உள்ள இடங்களை நேரில் பார்வையிட்டு ஆய்வு செய்வற்கு தமிழக உயர் கல்வித்துறை அமைச்சர் பி.பழனியப்பன் வந்திருந்தார். அமைச்சருடன் தமிழக கைத்தறி மற்றும் துணி நூல் துறை அமைச்சர், மருத்துவ்ர் ஆர்.சுந்தரராஜ், மாவட்ட ஆட்சியர் க.நந்த குமார், சேமிப்பு கிடங்கு வாரிய தலைவரும், மாவட்ட அ.தி.முக. செயலருமான, ஜி.முனியசாமி,  மு.முருகன் எம்.எல்.ஏ, மாவட்ட ஊராட்சிகள் கவுன்சில் தலைவர், வழக்குரைஞர் எம்.சுந்தர பாண்டியன்,
முன்னாள் அமைச்சரும், மாநில அ.தி.மு.க. சிறுபான்மையினர் பிரிவு செயலருமான ஏ.அன்வர் ராஜா, மாவட்ட முன்னாள் செயலர் கே.சி.ஆனிமுத்து, மண்டல உயர் கல்வித்துறை இணை இயக்குனர் சீத்தாதேவி, கடலாடி ஊராட்சி ஒன்றி ய தலைவர் வி.மூக்கையா, மாவட்ட செய்தி-மக்கள் தொடர்பு அலுவலர் வெற்றிச்செல்வி, உதவி அலுவலர் மகேஸ்வரன் வட்டாட்சியர் கே.அமிர்தம், மற்றும் அ.தி.முக. நிர்வாகிகள், உள்ளாட்சி பிரதி நிதிகள் உள்ளிட்டோர் பலரும் வந்திருந்தனர்.
கடலாடியில் சாயல்குடி சாலையோரம் உள்ள சமத்துவபுரம் எதிரே அரசிற்குச் சொந்தமான சுமார் 10 ஏக்கர் இடத்தைஅமைச்சர் பழனியப்பன் பார்வையிட்டு திருப்தி தெரிவித்தார். கடலாடி அரசு மேனிலைப்பள்ளிக்குச் சென்று கல்லூரி வகுப்புகள் நடைபெற உள்ள கட்டடங்களையும் பார்வையிட்டார்.  பின்னர் முதுகுளத்தூருக்குச் சென்று தேரிருவேலி சாலையோரம், தனியார் மெட்ரிக் பள்ளி அருகே, அரசிற்குரிய இடத்தை அமைச்சர் பார்வையிட்டார். அதில் சுமார் 11 ஏக்கர், 15 சென்ட் இடம் கையகப்படுத்தப்படுவதாக அமைச்ரிடம் ஆட்சியர் மற்றும் அதிகாரிகள் விளக்கினர். முதுகுளத்தூர் அரசு மேனிலைப்ள்ளிக்கு அமைச்சர் பழனியப்பன் சென்று வகுப்பறைகள் நடைபெற உள்ள கட்டடஙக்ளைப் பார்வையிட்டு ஆ ய்வு செய்தார்.  கடலாடியிலும்,  முதுகுளத்தூரிலும் தற்காலிகமாக கல்லூரி நடைபெறும் இடத்தில் கழிப்பறை, சுகாதாரம், குடி நீர், உள்ளிட்ட அடிப்படை வசதிகளைத் துரிதமாக செய்து முடிக்கும்படி அமைச்சர் பழனியப்பன் உத்தரவிட்டார்.

No comments:

Post a comment